كيف تكوّن فريق الأحلام؟

بدأت في مشروع؟ أو صرت مدير؟

 وتحتاج فريق يشيل الليلة وخطير!

كيف تنقّيهم ووين تلاقيهم؟ تختار اللي ينسجم معك؟ ولا اللي يكمّلك؟ وألف سؤال وسؤال يراود أي شخص يدوّر فريق الأحلام..

حدد احتياجك الشخصي قبل المؤسسي

قبل لا تبدأ عملية البحث والتوظيف، حدد احتياجك الشخصي قبل المؤسسي: مين ممكن يكمل نقصك؟ ووش اللي تفتقده من مهارات وصفات؟ ومن ممكن يساعدك على إنجاز مهمة العمل بأبهى صور التكامل

وش أنتم من لحية؟

معرفتك بطبيعة العمل مهمة جداً، تجميع فريق في جهة حكومية مختلف تماماً عن فريق في شركة ناشئة، أو في شركة كبرى، وثقافة العمل تختلف بحسب طبيعته، فهل هم منسجمين معها ولا بيقتلونها؟

اختر الشخصية قبل الشخص

تخيل معي الآن فريق الأحلام، وش الصفات اللي تبغاهم يتحلون بها؟ وش القيم اللي مفترض تجمعكم؟ ووش هدف العمل والمنشأة؟ وهل ينسجمون مع ثقافتها؟

حبة حبة تجي المحبة

لا تستعجل في تكوين فريقك، اختار بالتدريج وابن علاقة مع كل موظف، بحيث تقضي مع كل واحد وقت كافي تعرف مدى انسجامكم ومدى مناسبته لأهدافك وأهداف العمل

التجربة خير  برهان

—للأسف أن أي موظف مهما كانت مواصفاته رائعة، ما فيه أي ضمانة انه يكون موظف رائع، وفي الميدان ووقت التجربة هي المفصل الحقيقي اللي تقدر تحدد بعده إذا هذا الموظف مناسب أو لا 

وعشان كذا اخترع وسائل ومشاريع للتجربة فقط قبل المقابلة الشخصية أو اختبارات القبول، بحيث تقدر تختار منها الموظفين وتتخلص من غير المرغوبين بدون حساسيات.

العبرة مب بالكثرة 

حجم الفريق ما يغير كثير، لأن الشغل غالباً يطيح على راس شخصين أو ثلاث أشخاص، اما لأنهم الأفضل، أو لأن سوء توزيع المهارات والمهام ترك جزء كبير منهم مُعطل.

نوع أدوار الفريق، واحرص على أن تكون نقاط قوتهم مختلفة تماماً حتى تقل المقارنات وتنجو من فخ التنافسية.

وسع دوائر البحث

—-لا تعتمد على فريق التوظيف، أو على أقرب خيار موجود، تأكد إذا ما كنت مقتنع تماماً بشخص بأنك ستجد أفضل منه، وقد يكون عندك خلل أصلاً في الوصول للموظفين المستهدفين، والأغلب في السوق ما يعرفك أو ما يعرف ان عندك فرص. 

تأنى، وسع دوائر البحث، واسأل في السوق إلى ما تحصل المنشود.

أهم شيء الأخلاق

—-في تصنيف جاك ويلش يشوف أن القيم والأخلاقيات صعب تعليمها، لكن المهارة والأداء ممكن يتم تطويره وتحسينه. 

لذلك لا تترك حولك ناس ما عندها قيم، وممكن توصل للي تبغاه بأي ثمن ولو كان هذا الثمن، ثقافة العمل، ولا الذمة المالية، أو مبادئ إنسانية.

و أخيراً، وعشان تعرف انك مدير بالسليم، اسأل نفسك بين فترة وفترة: 

• هل الفريق اللي حولي يتماهى معي ويستمد كل معلوماته مني، ولا يتحداني؟ 

• هل يتفقون معي في كل صغيرة وكبيرة أم يعبرون عن آرائهم؟

• اسأل نفسك، لو طلعت إجازة أو تركت الإدارة هل هم قادرين على إدارتها بكفاءة عالية؟ 

إذا كانت الإجابات كلها لا، فغالباً ما اخترت ناس أقوياء كفاية، ويمكن وجودهم في مستوى أقل منك مريح على المدى القصير لكبريائك ولتنفيذ العمل بسرعة، لكن على المدى الطويل تطورك راح يوقف ويتحول الفريق، من فريق إلى مجرد حاشية.