صورة للذكرى

هارديسك من نوع HHD وقديم حبتين ماعاد قدرت ارجع افتحه واوصل للصور اللي فيه صوري في الثانوي الجامعة صور عائلية من ٢٠١٠ ومابعدها حفلات تخرج وزواجات وصور اطفال وصور احباب رحلوا عن الدنيا ذكريات منوعة وكثيرة كل فترة نفتحها ونتفرج عليها ونعيشها من جديد للحق بكيت لما حاولت افتحه وحاولت بكل الطرق وبقي سؤال! ايش البيانات اللي حاقدر استرجعها عند الفني؟ ايش من الذكريات دي حاقدر اعيشه من جديد؟ طيب إلى أي مدى انا احتاج احتفظ بهذه الذكريات من ١٠ سنوات وعليها ؟ حمدت الله ان عندي بعض الفديوهات لطفلي في عمر السنة والسنتين، وبعض الصور المطبوعة .. وبعض الذكريات من هذه السنوات لها نسخ على جهازي وعند أفراد الأسرة .. لكن أكثر من ١٠ الاف صورة وغيرها من الفديوهات لكل هذه السنوات .. الى اي مدى احتاجها؟ كل اللحظات حتى حياتي اللي قبل ٦ شهور، اتبدلت بلحظات اخرى، مو اقل من اللي سبقتها في الاهمية والجمال هل هذا شي متسق طبيعة الفطرة البشرية؟ ولا انا باتمسك بشي صار على مستوى مختلف عما انا عليه الان هل يناسب طبيعة خلقتنا وفطرتنا اننا نشيل ذكريات من ١٠-١٥ سنة وأنا الآن أتعامل مع واقع مختلف كليا، بفكر وعقلية وشخصية مختلفة تماما .. مرحلة مختلفة وحياة مختلفة ليه ابغا ارجع اعيش هذه الذكريات؟ هل باحاول اظل في المالوف اللي عرفته هل عندي الشجاعة اتركها تمضي وانا امضي في قطار الحياة للمحطة الجاية بكل خفة؟

هل احتاج استمر في حياتي محملة ومليانة ولا هذا الحمل يعيق المجال للحظات والاحتمالات الجديدة؟